FAS

Gantz-azido sintasa (Fatty Acid Synthase, FAS, ingelesezko sigla) entzima multifuntzional bat da, gantz-azidoen biosintesia katalizatzen duena (lipogenesia) gantz-ehuneko zelulen (adipozitoak) eta gibeleko zelulen (hepatozitoak) zitoplasman.

Gantz-azido palmitikoa sintetizatzen du Azetil-CoA-tik eta malonil-CoA-tik abiatuta, eta NADPHaren presentzian, zazpi erreakzio entzimatiko dituen prozesu batean. Horretarako, zazpi zentro katalitiko ditu entzimak, eta azilo-eramailea den proteina bat (ACP), substratua entzimaren zentro katalitiko batetik bestera eramaten duena.

Gantz-azidoen biosintesiaren lehen pausoa azido palmitikoaren —16 karbonoko gantz-azido asearen— sintesia da; gainerako gantz-azidoak (luzeagoak edo asegabeak) hura eraldatuz sortzen dira. Azido palmitikotik abiatuta, behar dituen gantz-azido gehienak sintetiza ditzake giza gorputzak, gantz azido linoleikoa eta linolenikoa —esentzialak biak— izan ezik. Lipogenesia hormonen bidez, dietaren bidez nahiz jarduera fisikoaren bidez erregulatzen da.

Erreferentziak

---

Nelson DL, Cox MM. Lehninger. Principios de Bioquímica. 5ª Ed. Ediciones Omega. 2007, Barcelona.